PNoy: ‘Pinas dapat ready sa nuclear meltdown!

Inalerto na ni Pangulong Benigno ‘Noynoy’ Aquino III ang lahat ng sangkot na ahensya upang maghanda sakaling magkatotoo ang pangambang total nuclear meltdown kaugnay ng aberyang dinaranas ngayon ng isang nuclear power plant ng kapitbahay na bansang Japan.

Ibinunyag ni deputy presidential spokesperson Abigail Valte na nagpa-brief na si Aquino sa National Security Council (NSC), Philippine Research Institute at PAGASA upang madetermina ang mga posibleng epek­to sa Pilipinas sakaling mangyari nga ang pa­ngambang meltdown.
Aminado si Valte na bagama’t hindi nila sinasabing mangyayari nga ito ay hindi naman umano puwedeng isantabi ng Philip­pine government ang katotohanan na malapit lamang ang bansa sa Japan.

“Madaming dapat na i-consider bago sabihin kasi proximity ‘yung sa lugar, gaano kalakas ‘yung madadalang radiation in the air. As of the moment, the President is in touch with the National Security Adviser, he has been initially up­dated by the NSA, the Philippine Research Institute and PAGASA to monitor the possible effects if in case the meltdown indeed occurred,” ani Valte.

Sa gitna nito ay tiniyak kahapon ng Malacañang na nananatiling hindi opsyon ng Philippine government ang paggamit ng nuclear power tulad ng pagbuhay sa Bataan Nuclear Power Plant (BNPP) dahil mas madami pa aniyang alternative sources of energy na mas ligtas at katanggap-tanggap sa lahat.

Kahapon ay sinabi ni Dr. Ted Esguerra, chairman ng Search and Rescue Unit Foundation Incorporation na nagsasagawa ng mga pag-aaral sa epekto at mga paghahanda sa kalamidad ng lindol at tsunami.

Sa ginanap na pulong balitaan sa Tinapayan sa Dapitan, sinabi ni Esguerra na hindi malayong maapektuhan rin ang Pilipinas ng radiation dahil malapit lang naman ang Japan sa Pilipinas.

“Puwede tayong maapektuhan ng radiation, depende sa ihip ng hangin kung makokontamina ang tubig, isda, tao at lahat ng living things,” ayon kay Esguerra.


source: abante.com